متابعة – مريم أبو شاهين
في أول تعليق له، اعترضت منى عطية، شقيقة الفنان المصري الراحل أحمد زكي، على تسليم مقتنياته لوزارة الثقافة، من قبل المستشار بلال عبد الغني، المحامي الأسبق لرامي بركات، الأخ غير الشقيق للفنان هيثم زكي.
وقالت شقيقة أحمد زكي: “أعترض بشدة على ما حدث فكيف لهم التصرف في المقتنيات دون وجه حق…المفروض إحنا اللي كنا نسلم المقتنيات وحاجته دي، المحامي ده يقربله إيه عشان يسلم المقتنيات، بأي وجه حق يتصرف فيها ويسلمها للوزارة إذا فعلاً كان سلمها..إيه يثبت تسليمه المقتنيات؟”
وأضافت منى عطية: “ليه فيه تجاهل لينا، ومش هنتنازل عن المقتنيات وهنرفع قضية واتنين وعشرين، وخلوا وزيرة الثقافة تتواصل معانا.. إحنا عايزين نطمن إن المقتنيات في مكان كويس وتستاهل مشوار أحمد زكي وتعبه، هو كان بيصرف على أفلامه وشغله وكل حياته في الفن”.
وبحسب شقيقة الفنان الراحل أحمد زكي، فإن “المحامي كان يطلب أموالاً مقابل تنظيفه للمقتنيات”، وأكملت: “كأنه بيتاجر بأعمال أحمد زكي، كنت سبتها لينا احنا ننضفها ونسلمها ونعمل دا، يهمنا المقتنيات يتحافظ عليها في مكان يليق بيه، بصفته إيه ياخد الجوابات وبأي حق، فيه أسرار لعائلة أحمد، وصور وقصة حياته كان بيكتبها، بأي حق يتطلعوا على الحاجات دي، وأصلاً مش كل المقتنيات معاهم فيه حاجات معانا”.
