أعرب أحد المواطنين عن استيائه من التعامل مع أحد فروع صيدلية “دلمار وعطا الله”، بعد أن كادت تتسبب في موت والده، على حد وصفه.
وقال المواطن في منشور له على جروب “The power of Social media in egypt(witthe out fear” صيدليات دلمار وعطا الله، اللي مفروض أنها مكان مشهور ومضمون، كانت على وشك تكون السبب في ـ لا قدر الله ـ موت والدي”.
وأضاف، “اتصلت بكذا صيدلية أسأل على دواء لازيكس ٥٠٠ المستورد، ومنها دلمار وعطا الله، عن طريق الخط الساخن بتاعها، وقالولي أن عندهم لازيكس مستورد ـ تحديداً الفرنساوي ـ الشريط بـ٤٠٠ جنيه، فسألت في صيدليات تانية أسماءها مش معروفة، وكانت الأسعار بتتراوح من ٢٥٠ لـ٣٠٠ جنيه”.
وتابع، “طبعاً وثقت في الصيدلية اللي ليها اسم معروف، وكمان في السعر الأعلى، ووالدي أخد الشريط كله، وكان ناقص منه ٣ أقراص، ولقينا حالته بتدهور أكتر، فروحنا للدكتور بص في الشريط، وقالنا ده معمول تحت السلم، ومحطوط في الغلاف، وكنت جايبه من صيدلية مش معروفة الشريط بـ٢٥٠ الدكتور، فقالي هو ده الأصلي”.
وأكمل، “فرق الفلوس مش مهم خالص، لكن أنتم متخيلين لو كان والدي استمر عليه، كان ممكن يحصله إيه، حتى لو مأخدتش حقي منهم، أنا حابب أن ده يكون توعية للناس، عشان محدش يحصله اللي حصلي”.
وأكد قائلاً، “كنت منزل البوست استنادا على كلام الدكتور بس، وتم التأكد من صيادلة تانيين، والدواء طلع مضروب بنسبة ١٠٠%، وبالنسبة لصيدليات دلمار وعطا الله، الأستاذ تامر خليل المدير التنفيذي للصيدليات، بعتلي يطلب مني بياناتي عشان يتواصل معايا، بعدها بساعات اتواصلت معايا أستاذة جورجيت، مديرة خدمة العملاء وانتهت المكالمة على طلبها مني أبعتلها صورة العلبة أللي أخدتها منهم، وبالفعل أول ما انتهت المكالمة بعتها، ولحد دلوقتي مافيش أي رد، وبالتالي بما أني أتأكدت من عدم صحة المنتج، وبما أن الصيدلية ملهاش رد على اللي حصل أنا اتقدمت بشكوى لجهاز حماية المستهلك”.